झी रोगी तिनि

पीर दुःख अति झ्यातुगु जीवन मयल थ्व ला अन्याः जुल बाः ।
सिच्चुक नुगलं बुद्ध लुमंकाः वचनामृतया थ्वीक्य सवाः ।
थॏ थ्व जुनी थुलि दुःख धाःसा वैगु जुनी झं गुलि जक ज्वी ।
तःजिगु वैभवया खँ छखे ति, थॏया थुलि नं दुर्लभ ज्वी ।

थॏ रोगी झी, रोग अविद्या वासः ज्ञाँ खः माःगु त्वने ।
स्वामा गंकाः, हा चन्य धुंका चां जक फै मखु वैत थने ।
स्वाँ व सिन्हः व किगलं कयेकाः धुं व इतालं कुं गयेकाः ।
पूजा धाधां ज्वी धुन झीपिं गुरूया सत्य लँ तोफीकाः ।

सीकं चायक वा मथुयाः नं थॏतले गुलिनं द्वंक्य धुन
बुद्ध लुमंका वा पाफयेके द्वंगु लिस काय् मखुत हनं ।
खसुतिं दायेकाः स्वाँ नी जू थेँ मन नी ज्वीके शील लखँ ।
स्वच्छ पवित्रगु नुगलं याकनं भाःपी थुजिक बुद्ध वचं ।



च्वमी - लाभरत्न तुलाधर

आनन्दभूमि, बु.सं. २५६१, वि.सं. २०७४ ल्हुति पुन्हि वर्ष ४५ अंक १२ स प्रकाशित